Wastas no?
2021
Wastas no?
Denan Leichentrega hot da Wind dschwoazn Jackn aufblaht, ois wuatatns glei ohem, saumtn Soag. Es letzte Gschichtl hot da Pforra gsogt, dea di ned kennt hot, ned so guad wia i, des letzte Gschichtl hot ned gstimmt. Ea muass wos song, hest gsogt und glocht. Putz di, hättst gsogt, mit dein Blabla, geh bodn mit dein God.
"Wastas no?", kaun i jetz nimma song, die Gschichtl bleim alla bei mia. Da Soag mit dia get owe in die Gruam, du woast a Teu vo mia. Sechzg Joa hob i di kennt, do kummt a weng wos zaum.
Aum Aufaung hob i glaubt, du mogst mi ned, und i hob mi weng dia so gschaumt. Schwoaz putzn woast im Kino und im Gschäft, i woa ima mid mid dia. Wast as no? Im Kino haum ma untad Sitz de Schülling gfundn und uns drum wos Guates kauft. Da Greissla hot da oft an Dopla gschenkt, den host daham beim Bügln trunken und dabei Peta Alexanda gheat. I hob di maunchmoi direkt ghosst.
Wastas no, wiasd aufs Finanzaumt gaunga bisd weng ana Stö? Aussekumma woitatst aus de via Wend. Ea owa woitat ned, weng an gaunz an laungan Wuat. Wos des woa hob i ned vastaundn ghobt, nua dass wos gaunz wos Wichtix sei hod miassn, du hostas jo auf Hochdeitsch gsogt. "Dea Trottl", host du gsogt, "dea losst mi ned".
"Wiaso denn des?", hot Nochbarin gfrogt, "es brauchts des Göd do eh."
"Wengan Alleinverdienerabsetzbetrag", host gsogt und jede Süm gaunz fest betont.
Späda host mi packt und mia san nomoi aufs Finanzaumt grennt. "I putzat schwoaz", host zu da Frau duat gsogt, "Ea untaschreibt ma fia die Steianumma ned."
I was nimma wos die Auntwuat woa, i erinna mi nua mea auns Gfüh. A Gfüh, wia waunst di schaumst, wasd owa ned, wiaso.
A Zeidlaung hob i di ned gseng, do woa i in an aundan Laund. Wastas no, wia i daun wieda kuma bin, und du host di gfreit ois wia? Wastas no, wia i di daun ins Heim brocht hob, wia da Voda auf amoi nimma woa.
"I wü ins Heim", host gsogt und i bin mit dia umegfoan. Di haum uns umanaunda gfiat und dia den Goatn und de Zimma zagt. Obst a Anzlzimma wüst oda ans mit zwa Bettn drin, haums gfrogt.
"I wü ham", host gsogt, "Bettn haum ma söwa gnua." Daun woast no vü Joa alla im Haus, mia san vü zaumpickt. Jetz is nem mia a Loch.
Veröffentlicht im Morgenschtean, Mai 2021